OrBinah

(En ar. marocain; graphie ar.) Le type aux petits boulots et l’excavation du le trésor (comte)

حجّاية' البورحماوي والجــــنّ مول الكنوز

 

 

 

 

هاذي حجّاية حكاها ثيربانطيس المراكشي فجامع الفنا؛ وزادو عليها الخّوت شي فُّـيخرات، وتباخيرات، وبزيّـرات من عندهوم. ومعا الحجّاية كاين فيديو ديال واحد الواقيعة ما عندها معا الحجّاية حتّى شي علاقة!

.

كا يحكيو بلـّـي واحد الشريف بـباراكتو، قرا عقود جدودو ولقى اللي لقى. عيّـ'ــط على واحد الفقيه ديالو حافظ القُّران وقاري الدمياطي، وأبو معشر، وعولوم الحوروز والكونوز والرابوز. ورّاه واحد الرسـ'ــم من دوك العقود، وقال ليه: يوا، ورّيني حــنّـة' يديك.

مشى الفقيه لعند المقدّمة ديال الوليّة، ستّي فاطنة، وشرى من عندها شي تباخيرة فاعلة تاركة منّها تاوسرغينت ديال جبل سيدي شيمــهاروش، ومشى عيّـ'ـط على واحد طالب-معاشو من باب دكُّالة سميتو البورحماوي، كان كا يسترزق الله؛ فا هوّا نهار حمّال، نهار بنّاي، نهار حفّار قبور ... وقال ليه: جيب معاك واحد الفاس، راه عندي ليك شي خدمة اليوم بالليل.

ملـّي ركًدو المومنين، وما بقى سيوى الديب وموكا وعتروش الجداريى فايقين، مشاو دوك الناس بثلاثاهوم في نصاصات الليل، فواحد الليلة ما كا يضوّيها غير غبـ'ــش النجوم، وقصدو واحد الجنان د-الزيتون في أغمات. كان الفقيه، بجلابتو، هازّ فيديه واحد الشمعة مضرّقها بحفنة' يديه بزوج؛ وكان الشريف، بسلهامو، هازّ تسبيح فواحد اليدّ وواحد المبيخرة فاليد الأخرى؛ وكان البورحماوي لابس فوقية على الجلد، وهازّ واحد الفاس على كتفو.

ملــي وصلو عند واحد الصفية خارجة من الأرض بحال شي قُـرضيعة فالسنطيحة، قال ليهوم الفقيه: صافي، وصلنا. قال للبورحماوي: عبر 20 خطوة طويلة لجيهة القبلة من هاذ الصفية، وحـ'ــطّ تمّا حجرة. حـ'ــطّ البورحماوي الفاس حدا الصفية، وهز واحد الحجرة وبدا كا يطوّل الخطوات حتّى وصل 20، وحـ'ــطّ  ديك الحجرة.

قال لو الفقيه: أجي دابا آ-البورحماوي، ودير نفس الشي لجيهة اليسـ'ـر من هاذ الصفية. زاد عاود-تاني البورحماوي كا يعبـ'ــر الخطاوي حتى وصل 20 وحـ'ــطّ  تمّا حجرة أخرى.

قال لو الفقيه: عبر ما بين دوك الزوج د-الحجرات، وحـــطّ فالو'سط حجرة ثالثة كبيرة. سخـ'ــن البورحماوي فالخدمة، وشاف بلــّـي الفقيه والشريف واقفين كا يتأمّـلو الخدمة ديالو، ودار اللي قال ليه الفقيه.

قال ليهوم الفقيه: اجيو؛ هاحنا لقينا بلاصة الكنز؛ يا الله آ-البورحماوي، الفاس-الفاس فبلاصة هاذ الحجرة الثالثة الوسطانية.

تمّا، ولـّـي البورحماوي، بعدما سخـ'ـن، منوّ'ض العجاجة بحال شي ثور ديال الكًـُــرنة. شويّة، ها واحد الهزّة من تحت رجلين دوك الناس ديال نصاصات الليل؛ وناضـ'ــت واحد زويبعة د-العجاج والدخّان خرج منّها واحد الجنّ أزرق العينين، وكحــ'ــل الراس، ومبـلّـ'ــق عينيه، ومخرّ'ج ظفارو، ومطلّــ'ـع الشعبيطة ديالو بحال يلا قاسو الطايكوك. قال لأصحاب ناشاط نصاصات الليل:

"انا بالله وبالشراع معاكوم؛ غادي ندوي معاك، بعدا نتا، آ-مول الفاس، اللي فيّــقني من النعاس. كا نشوف بلـّــي هاذا شريف بباراكتو وباراكة' جدودو، وبلـّـي هاد الأخُر فقيه حافظ القّران ديالكوم وقاري بعض "الربعات" ديال العالام ديالنا، اللي هوّا ما-شي العالام ديالكوم؛ ونتا، يا البورحماوي، يا طالب-معاشو، اشنو جابـ'ـك باباك لهاذ المشطبّة باش تجي تكسر ليّا نعاسي بالفاس ديالك فنصاصات الليل وتحاول تدّي لي المصيدة  ديالي باش كا نصيّـد؟ واش ماعرفتي-ش يا الصكًـ'ـع بلــّي، حتّى والاو خرّجتي الكنـز لراسك كًاع، غادي يقولو ليك دوك اللــي عارفينك طالب-كعاشو في "باب دكُّالة" : "مننين جبتي هادشّي؟". لوكان كُـنتي قاري الدورة ديال الأبراح، بحال سيد الفقيه، كُنتي غادي تعرف بـلـّـي النوبة نوبتي، وبأني أنا الجنّ اللي حاكم اليوم فالكون؛ ... اولّا، يا سيد الفقيه؟ (... صحيح، آ-سيد الحاكم؛ هاداكشّي هوّا اللي كا يبان من الجداول ديال عليم الكرش وديال أبو معشر).

وزاد الجنّ وقال: شوف آ-البورحماوي، هادي الوحدة ديال الصباح؛ أنا الحاكم، ما نقبـ'ــل-شي يجي البورحماوي من الموقف ويسهّـرني. يوا تخيّـ'ــر: إمّا نمسـ'ــخ يمّاك خرّوبة يابسة، وأما نمسخـ'ــك باباك سبسي ديال الكيف.

قال البورحماوي، اللي بلّــ'ـل بعدا كعابو وصاندالتو لأنه ما كان-شي يسعى سروال: "سيد الحاكم، اللاهُـمّا سبسي د-الناشاط في نصاصات الليل، والا خرّوبة يابسة تاكُلها شي معزة مجرابة وتخـرّجها برّيو؛ ونتا مول الكلمة اللـ'ـخرة، يا سيد الحاكم.

حـ'ـطّ الجنّ الحاكم يديه، وكان عسري، على راس البورحماوي؛ وتمّ-تمّ رجع داك طالب-معاشو ديال "باب دكُّالة" سبـــسي ديال الزبّوج، باللكُـازي ديالو، وبشقــ'ــف ديال الرخام.

---------

الواقيعة اللي ما عندها حتّي شي علاقة بالحجّاية:

https://www.youtube.com/watch?time_continue=10&v=vYOfDXqkrLo



21/10/2017
0 Poster un commentaire

Inscrivez-vous au blog

Soyez prévenu par email des prochaines mises à jour

Rejoignez les 185 autres membres