OrBinah

(EN AMAZIGH-Berbère) 5-extraits de la Comédie Berbère-

مقطوعات من الملعبة الأمازيغية

(Mohamed Elmedlaoui. La Comédie Berbère. 2008 )

المقطوعة 5

 

توسّنا س-يميـيّــنّ

 

ها غيلا شّـقيقت ن-يكًويّـا ن-"يموهاغ" نغ:

ار-تن يــزّاض شّـكّ،  يقنّ-اسن-د  يفلوان

ار-تن يزّاض لهول، يدل-اسن تيفاوين

يمّـجداول وضار، يكًـ وكًري تيلوّاييــن,

امشكاك، دا يتّـيكصاد غ-ومالو نّا لان،

يكًـُّــركًـُــر-د  يْيـمان نّس،  يفّغ-اس لخير ول نس.

-------

زرين يد-بو-يسوينكًيمن، تاسوت  ف-تايّاض،

غ-لكًـنس-اد والا غـُّـانّ، ار ساتّويْن تينّاي

غ-لعولوم د-ومادان، طـّبيعت د-يسكًماي؛

امر يان يغرف، لـّي-نّ يجلان يمان خلون.

 [امريايّغرف]

ور فهمن غ-ومادان-اد  مامنك ا-س لاّن؛

والا سنّ ي-ليمور نس مامنك ا-س فتان؛

ور-نّ يزري،  غ-رّي د-ينباضن ن-دولات،

د-لعولوم، د-ومادان، طـّبيعت د-يسكًماي،

ما لّي-ياس-د  يسغرا  بومحند  غ-زيكّ لحال

س-يميـيّـنّ-دا  لـّي-دي  تّـكّـسنت  تفـقّيريـن.

-----

يلاّ بومحند، يلاّ وْوشن، دّوكّـلن وكان؛

ماشّان، يمخيتيلن د-وشميتن كا-ف دّان؛

تيلي تاغُـزنت لّي-اسن يسغُين اد نمالان.

                [لاّسنــــــيسغُين]

--------

رّشم-انّ ا-ف يسّودا ومادّر-دا  ن-زمان؛

غايانّ ا-يكًان امزروي ن-ومادّر ديمال:

واخّا نيت غاسّا فيسّانت اكُّـ تفـقّيـرين،

يساول-د تيليفيزيون، حوزن-د اكُّـ اوال،

امرّوك سول وكان يضفر تيلّي ن-زمان:

تيميــيّـنت، سول وكان، ا-يس يكًان ارشّام،

وادا  ن-وكًـُـري د-وكًايّو س-دا كًرّون اوال،

س-ا كًرّون ماياد يلاّن والا مادّ يقّان

 

"zund ukan iDgam, zund vassad v-tmazirt n-imiyn d-uHwac".

ssksav wahli mnck ayad s-mad snifiln trubba n-wammasn imadann v-uSTTa n-lanTirnit.

ufiv-nn mas bahra iHfa icHu kullu mayann.

ar-d kttiv tizi lliv-stt-inn nkka nmZZiy, d-man rrhD n-lhmm ad-stt-inn ikkan yiwi ar ittawi ixf imiddn.

ttmi nns ma izdin s-tizzla n-lm3ict azal-azal, kra n-iHwacn, kra n-tmvriwin, kra n-sslkwat v-iDwwarn, kra n-id-sksu n-lmcruf v-lamwasim, kra n-isillifn s-icnyaln d-laclamat n-lawliya n-tqqbilin, kra n-imivn ngr kra n-id-yan d-ngr kra n-tiqqbilin, kra n-laxbar n-tnwwact niv kra imiynn n-fqqirin v-yiD, niv win kra n-TTlba v-uzal, kra n-imivn v-laswaq, v-lamwasm nivdd v-igran, kra n-izawarn v-iswak n-iDuran niv kra n-in3abarn v-usays

lliv nmqqur, nvr imikk, ibayn-avd masdd v-tizi-ann ukan, zrin v-ddunit amaka n-iswingimn d-lahmum d-isqqistn n-tussna d-tsyyast. izri imiv amaDlan wiss sin, snifln middn vmani yaDni isqsitn f-flsaft n-izrfan n-ufgan d-lictirakiya, d-war-asnuHyu d-kullu ma s-ur imkin ad-t-id vid kullu nbdr.

izri nit ad yini yan masdd iv ur iHadr yat ssv kullu mayad nbdr v-lhmm d-uswingm n-tizi lli v-nmZZiy, hann acku ur imil tlli tvri d-ulmmud v-tasutin lli izrin afad iZdarn middn n-tasut nnv ad drun v-iswingim imaDlann imqrann, ffvn imikkatin ssv icbukn mZZiynin iHfan d-izwarn n-tqqbilin, snifln d-wiyaD isqqsitn yattuyn llinn ikkan nnig n-imHukkutn mZZiynin d-izawarn d-ismummiyn ur ilin ttmi.
walaynni vassad, lliv vrant mnnawt tusutin, ilint darsn tutlayin n-usiggl d-tussna d-unyalkam. macca, mad-d akkw zakakn igan amaynu? nkki Zrix-nn masd var ismummuyn lli, willi-willi; azawar lli walli-walli; imiynn, lli willi walli; ma ur igin massd vassad, ar ttaran middn vaylli stt-inn kkan ar-t-id hlli ttinin s-uqmmu.



12/01/2015
0 Poster un commentaire

Inscrivez-vous au blog

Soyez prévenu par email des prochaines mises à jour

Rejoignez les 323 autres membres